Tocante a min
El Conceyu Abiertu pola Oficialidá (CAO) ye una plataforma cívica que tien como únicu oxetivu algamar la oficialidá de la llingua asturiana y del gallego-asturianu nel Estatutu d’Autonomía d’Asturies.
Les llingües d’Asturies son el nuestru patrimoniu, la nuestra ayalga histórica, la nuestra riqueza cultural, y queremos que sigan vives. Como ciudadanos y ciudadanes queremos que se puedan falar tolos díes con naturalidá y con arguyu. Porque depués de trenta años de reivindicar los nuestros derechos y de pidir una oportunidá pa vivir con normalidá, fáltanos esa marcación llegal que nos dea les garantíes que tienen les llingües reconocíes estatutariamente.
El CAO tien entamao munches actividaes pa reclamar la oficialidá: manifestaciones, esposiciones, marches a pie y en bici, caravanes per tolos conceyos d’Asturies… siempre pidiendo convivencia, respetu, derechos, igualdá pa tol mundu fale na llingua que fale. El CAO concéntrase ente la Xunta Xeneral tolos díes que s’aconceyen los representantes políticos que tán discutiendo la ponencia estatutaria de reforma. Failo pa recordar que n’Asturies hai un asuntu pendiente en cuantes a derechos democráticos y que l’Estatutu d’Autonomía tien que lu resolver reconociendo la oficialidá.
En definitiva, el CAO ta formáu por miles de persones que dan la cara pola oficialidá. ¿Va faltar la tuya?
